عوده الروح

الدنيا كتير أوي بتشغلنا بهمومنا و مشاكلنا , و تخلينا نجري ورا حاجات كتير في حياتنا لغاية ما نتعب و احنا بندور عليها و نفضل نلف في دايرة مفرغة محورها احنا و أهدافنا و أحلامنا اللي ممكن تتحقق و ممكن لأ , و ننسى ان حوالينا ناس كتير أحلامهم أبسط من احلامنا و كل اللي بيتمنوه انهم يلاقوا اللي يسمعهم و يهون عليهم مشاكلهم .

حياتي كانت ماشية كده و كنت بلف في الدايرة و مع الدايرة لغاية ما ربنا أراد أني اخرج منها في افطار الأيتام في نادي الجزيرة و بني منين في رمضان السنة اللي فاتت , عشان أحس بان فيه محاور كتير في حياتنا غيرنا , فيه أحلام ممكن نحققها لناس كتير غيرنا , فيه لحظات سعادة ممكن نخلقها بادينا و منستنهاش تجيلنا أو نتعب و احنا بندور عليها .

روح خليتنا نحس اننا لينا قيمة كبيرة أدام نفسنا ...خليتنا نحس بناس حوالينا عايشين معانا و حوالينا لكن مكناش معاهم و لا حاسين بيهم ...خليتنا نحس ان الدنيا مش بتقف عند طريق مشينا فيه و مكملشي أو أمل كان نفسنا فيه و ما اتحققشي ... خليتنا نحس ان لحظة بتعدي علينا و احنا بنسعد ناس غيرنا تسوى الدنيا و ما فيها ...خليتنا نشوف همومنا قصاد عينينا صغيرة أوي أدام هموم ناس غيرنا ... خليتنا نحس ان النهاردة مش المفروض يعدي علينا زي امبارح و لا يتحسب علينا من عمرنا على الفاضي قبل ما بكره ييجي علينا ...خليتنا نحس اننا أسرة واحدة بجد , ساعات هنختلف و أحيانا حنزعل و يمكن الشيطان يدخل ما بينا بس في الآخر هنرجع نمشي تاني في طريقنا اللي بداناه ونكمله مع بعض . .. خليتنا ننسى أنانيتنا و حبنا لذاتنا و نعيش لحظات كلها صفاء مع أيتام سقيل , و وفاء للمسنين , و براءة مع ملايكة دار القدس , و سعادة مع أطفال ألأورام و ذكريات بتكبر جوانا بمرور الأيام .

و دلوقتي بعد مرور سنة لينا مع روح , حاجات كتير اتغيرت جوانا , و أحاسيس كتير جميلة مست قلوبنا , راجعين من تاني رمضان السنة دي بأنشطة جديدة , و أيام جميلة هنعيشها معاكم و تعيشوها معانا و مع ناس جميلة هتفرحوا بجد انكم عرفتوهم و ساعدتوهم و هونتوا عليهم همومهم .

احنا محتاجينكم كلكم معانا , تنضموا لجمعية روح و تشتركوا معانا و نسعد بوجودكم معانا و وجودنا معاكم في رمضان السنة دي .

اللهم بلغنا رمضان و تقبل منا صالح أعمالنا و اجعله في ميزان حسناتنا جميعا